ಅಯ್ಯೋ ರಸಂ ಅಲ್ಲ ಸಾರು!

ನನ್ನ ಚಿಕ್ಕಂದಿನಿಂದ ನನಗೆ ಪರಿಚಯವಿರುವ ಹಲವಾರು ಹೆಸರುಗಳು ಇತ್ತೀಚೆಗೆ ಕಣ್ಮರೆಯಾಗುತ್ತಿರುವಂತೆ ತೋರುತ್ತಿದೆ. ನನ್ನ ಬಾಲ್ಯದಲ್ಲಿ mummy/daddy ಒಂದನ್ನು ಬಿಟ್ಟರೆ, ಸುಮಾರಾಗಿ ಬೇರೆ ಎಲ್ಲಾ ನಾಮಪದಗಳೂ ಕನ್ನಡದಲ್ಲಿ ಸರಳವಾಗಿ ಜನರ ಬಾಯಲ್ಲಿ ವಾಸವಾಗಿದ್ದವು.

ಆದರೆ, ಈವಾಗ ಎಲ್ಲವೂ ತಮಿಳುಕರಣ ಆಗಿಹೋದಹಾಗೆ ಇದೆ. ಉದಾಹರಣೆಗಳು.

ನಮ್ಮ ಮನೆಯಲ್ಲಿ ಅಚ್ಚುಕಟ್ಟಾಗಿ ಅನ್ನ, ಹುಳಿ, ಸಾರು, ಪಲ್ಯ, ಮೊಸರನ್ನ ಊಟ ಮಾಡುತ್ತಿದ್ದ ನನಗೆ ಈಗ ಜನರ ಬಾಯಲ್ಲಿ rice, ಸಾಂಬಾರ್, ರಸಂ, curd rice ಹಾಯಾಗಿ ಹೊರಳಾಡುವುದು ನೋಡಿದರೆ, light ಆಗಿ ಮೈ ಪರಚಿಕೊಳ್ಳುವ ಹಾಗೆ ಆಗುತ್ತದೆ. ಹುಗ್ಗಿ ಮತ್ತು ಹುಣಸೆಹಣ್ಣಿನ ಗೊಜ್ಜನ್ನು ಈವಾಗ ಪೊಂಗಲ್/ಚಟ್ನಿ ಪಕ್ಕಕ್ಕೆ ತಳ್ಳಿದೆ. ಹೋಟೇಲುಗಳಿಗೆ ಹೋದಾಗ ಬಿಸಿ ಬೇಳೆ ಭಾತ್ ಹುಡುಕಿದರೆ ಕಾಣುವುದು "ಬಿಸಿ ಬೇಲ ಬಾತ್". ಅದರ ಹೆಸರು ಆ ರೂಪದಲ್ಲಿ ಇದ್ದಾಗ ಹೊಟ್ಟೆಗೆ ಇಳಿಯುವುದು ಕಷ್ಟ. ನನ್ನ ಪ್ರಿಯವಾದ ದೋಸೆ "ದೋಸಾ".

ಇಷ್ಟೇಕೆ. ರಾಮನಗರ ರಾಮನಗರಂ ಆಗಿದೆ. ನೂರಾರು ಬಾರಿ ಮೈಸೂರಿನಿಂದ ಬೆಂಗಳೂರಿಗೆ ಹೋಗಿ ಬಂದಾಗ ಕಾಣುತ್ತಿದ್ದ ಊರು ಮಾಯ! ಬೆಂಗಳೂರಿನ ಬನ್ನೇರುಘಟ್ಟ/ಬನ್ನೇರ್ಘಟ್ಟ ಇಂದು ಬನ್ನರ್ಗಟ್ಟ (ಇಂಗ್ಲೀಶಿನಲ್ಲಿ Bannargatta). ಹಲಸೂರು ಯಾವಾಗಲೋ ಅಲಸೂರಾಯಿತು.

ದುರಂತವೇನೆಂದರೆ, ನಮ್ಮ ಜನಕ್ಕೂ ಇವೆಲ್ಲ ಬೇಡವಾದ ವಿಶಯಗಳು. ಪರರು ನಮ್ಮತನವನ್ನು ಪಕ್ಕಕ್ಕೆ ತಳ್ಳಿ ಅವರ ಹೆಸರುಗಳನ್ನು ನಾಮಕರಣ ಮಾಡಿದಾಗಲೂ ಅಕ್ಷತೆ ಕಾಳನ್ನು ಚಿಮುಕಿಸುವ ಜನ ನಾವು!